ooo

...
Searching...
11/05/2012

Danışan ət kuklalar

May 11, 2012


Kukla çeşidləri çox olur. Çin malı var? Avropa istehsalı var. Məhşur markalar var, İran kuklaları var. Və nəhayət, bir də var milli – Azərbaycan istehsalı danışan ət kuklalar (bundan sonra DƏK). Bu qrup xanımları Seymur Baycanın CDİC-ləri (cəmiyyəti dəyişmək istəyən civilər) ilə səhv salmayın. CDİC-lər DƏK-ın dəyişib inkişaf edən formasıdı.

Demək, DƏK necə olur. Təsvir edək: “Papa”larının gül balaları olurlar, “papa”ları hiperqeyrətli olduqları üçün yubka geyinməzlər, əvəzinə dar sözünün r-ini uzun söyləyəcək ölçüdə şalvar geyərlər, oğlanlara nömrə verməzlər, “inbox”da yazarlar. Hələlik bu qədər bəsdi.

DƏK-ın öz beyni, öz sözü olmur. Danışan ət kukla qadın cinsinə mənsubdur, lakin insan deyil. Öz düşüncəsi, özünə məxsus fikri, şəxsi qərarı yoxdu. O yalnız idarə olunmağı sevir. Ailə həyatı qurmamış ata, qardaş, əmi oğlu, xala oğlu, bibi oğlu sözü ilə durub-oturur, sonra isə həyat yoldaşının. Onun özünə aid, təkcə, gözəl baxışları ola bilər. Onu da ki, Allah veribsə əgər. Bizim mentalitetimiz insanlarımızda elə düşüncə yaradıb ki, əgər qıza, qadına nəzarət olmasa, o mütləq əxlaqsız olacaq. Elə bil insan orqanizmindəki vərəm çöpü kimi. Hamıda var, lazımı anda baş qaldırır.

DƏK “bizdə də var” xatirinə ali məktəbin dəhlizlərində şəkillər çəkdirib, fotolardakı başlarını kəsib facebook-a yükləyə-yükləyə dörd ilini doldurub diplom alır. Nə var ki, “papa”sı hansısa məclisdə “mənim qızım diplomlu qızdı, “prosta” mən işdəməyə qoymuram” desin deyə.

DƏK dərs başlayandan, ta sonuna kimi evə getmir. Çünki, evdə elə saxlanılır ki, artıq onun üçün məktəb və ya ali məktəb “azadlıq adası”na çevrilir. DƏK özünü tanıyandan yalnız bir missiyası var - ərə getmək. Bu arzusuna daha asan, daha tez çatmaq istəyənlər bu yolda çox əzablar çəkir. Parklarda sinəsini qarakurtkalı qaqaşlara sipər edir, gecələr yorğanın altında ağlayır. Sonda, məqsədinə yetişir bi gün.

DƏK kitab oxumur. Hətta, kitabı lazımsız bir şey sayır. Çünki, kitab oxumaqdansa, pul qazanmaq qazanc gətirir onun fikrincə. Lakin, özünü intellectual göstərmək üçün səy göstərir.

DƏK seçkilərdə iştirak etmir, şəxsiyyət vəsiqəsini “papa”sı götürür, o da öz növbəsində ən layiqli namizədə səs verir. Deyilənlərə görə, bir millətin böyük olması üçün ən böyük vəzifə analarının üzərinə düşür. Övladlarının anası danışan ət kukla olan millətin böyük millət olma şansı var.

Sonda bu mahnını onlara həsr edirəm :)



[youtube http://www.youtube.com/watch?v=xN1J4x_UFXM]

0 şərh:

Post a Comment